L-Istorja Tagħna

L-istorja ta’ dan l-istazzjon tar-radju bdiet bix-xewqa persistenti ta’ wieħed Kristjan, André Camilleri, li kien imxennaq biex jara l-verità t’Alla proklamata fiċ-ċar u fedelment permezz ta’ radju lokali, bil-Malti u l-Ingliż. Dak li tnissel bħala toqol personali għall-firxa tal-evanġelju ma damx ma sar viżjoni ta’ diversi aħwa fi Kristu, billi dix-xewqa kienet komunikata lil ħaddieħor, li għarfu l-valur tat-tali ministeru u inkuraġġewh biex jaħdem fuqha.

Bil-parir, l-għajnuna prattika, u l-appoġġ ġeneruż tagħhom, il-viżjoni bdiet tissawwar. Ingħelbu diversi sfidi u limitazzjonijiet, dejjem bil-providenza tajba t’Alla. Magħquda fil-għan u l-imħabba għal Kristu u l-Knisja tiegħu, dawn l-aħwa ħadmu flimkien biex jistabbilixxu l-istazzjon. Fdaw mhux fil-ħila umana iżda fis-Sid Ġesù li jibni xogħlu permezz ta’ qaddejja għad-dispożizzjoni tiegħu. Mill-bidu nett, l-istazzjon huwa testimonjanza ta’ komunjoni Nisranija, konvinzjoni bejn ħafna, u l-barka tal-Mulej fuq proġett sostnut għall-glorja tiegħu waħdu.